ՎԵՐԼՈՒԾՈՒԹՅՈՒՆ

Մենք պարտավոր ենք կողմնորոշվել մեր դաշնակիցների հարցում, այլապես պետության կարգավիճակն իջեցվում է ազգային օջախի կարգավիճակի․ Միքայել Հայրապետյան․ Lragir.am

Մեր զրուցակիցն է Պահպանողական կուսակցության նախագահ Միքայել Հայրապետյանը

Պարոն Հայրապետյան, Ընտրական օրեսգրքի փոփոխություններով ամբողջական պարզ համամասնական ընտրակարգի անցում կկատարվի։ Ինչպե՞ս եք գնահատում, հնարավո՞ր է այս փոփոխությունների արդյունքում դաշինքով մասնակցեք արտահերթ խորհրդարանական ընտրություններին։

Շատ հավանական է. տեսնենք:

Ըստ Ձեզ՝ հանրությանն այս ընտրությունները հետաքրքրո՞ւմ են, և հաղթահարելո՞ւ են քաղաքական ճգնաժամը։

Վստահաբար արտահերթ ընտրությունները, ինչի մասին խոսում ենք ռազմական գործողությունների դադարեցումից ի վեր, հանրությանը հետաքրքրում են: Սակայն այսքան ուշացնելու պարագայում արդեն սկսել եմ կասկածել՝ գուցե ավելի՞ խորացվեն դիմակայությունները, փոխատելությունը, քաղաքական ճգնաժամը, հանրային ատոմիզացիան՝ հասցնելով նաև քաղաքացիական բախումների, ինչը բացառապես ռուս-թուրք-ադրբեջանական շահից է բխում:

Պարոն Հայրապետյան, որքանով այս ընտրություններն աղերս ունեն այն մարտահրավերների հետ, որոնց առաջ կանգնած է Հայաստանը։ Մասնավորապես, Ալիևը Թյուրքական խորհրդի նիստում խոսել է պատմական հաղթանակի մասին՝ Զանգեզուրի հիշատակումով,  նշելով, որ «ադրբեջանական այդ պատմական տարածքը շուտով միավորելու է թյուրքական աշխարհը»:

Ձեր նշած լրջագույն մարտահրավերը պետք է լուծի իշխանությունը, մինչդեռ մեր այսօրվա իշխանությունը, պարտված լինելու հանգամանքով, ցավոք, չի կարող դա անել: Ելքը մնում է նոր իշխանություն ձևավորելը. Իսկ օրինական իշխանությունը ձևավորվում է հիմնականում ընտրություններով:

Սյունիքի հետ կապված անորոշությունը խորանում է։ Ինչպիսի՞ լուծում եք տեսնում։

Այս տարվա դեկտեմբերի 31-ի լույս հունվարի մեկի գիշերն է Պահպանողական կուսակցությունն արձանագրել՝ «2021-ը նժդեհության տարի»: Ուշադրություն՝ ոչ թե նժդեհականության, այլ նժդեհության, այսինքն՝ ինքնամոռաց նվիրման, մտքի ու ոգեղենության: Մենք պարտավոր ենք կողմնորոշվել մեր դաշնակիցների հարցում, այլապես պետության կարգավիճակն իջեցվում է ազգային օջախի կարգավիճակի:

Աղբյուրը՝ Lragir.am, հարցազրուցավար՝ Սիրանույշ Պապյան, 02․04․2021թ

Share this Post: Facebook Twitter Google Plus Email
Copyrights © 2017 & All Rights Reserved.